ರೇಖೆಗಳಲ್ಲಿ ಮೌನ ಮೀರಿಸುವ ನಿಶ್ಯಬ್ದ!

• ಸುಮುಖ ಗ್ಯಾಲರಿಯಲ್ಲಿ ಶಕುಂತಲಾ ಬಹುಮುಖ ಕಲಾದರ್ಶನ
• ರೇಖೆಗಳಲ್ಲಿ ಕಥೆ ಹೇಳುವ ಧಾರವಾಡ ಮೂಲದ ಕಲಾವಿದೆ

ಹೆಣ್ಣಿನ ಪರವಾದ ಗಟ್ಟಿ ಧ್ವನಿಯದು. ಹೆಣ್ಣಿನ ಸಂವೇದನೆಯದು. ಹೆಣ್ಣಿನ ಮನದಾಳದ ನೋವದು. ಹೆಣ್ಣಿನ ಸಂತೋಷವದು!

ಹೆಣ್ಣು ತಾನು ಕೆಲಸ ನಿರ್ವಹಿಸುವ ಕಚೇರಿಯಲ್ಲೋ, ತನ್ನ ಮನೆಯಲ್ಲೋ ಅಥವಾ ಸಾರ್ವಜನಿಕ ಸ್ಥಳದಲ್ಲೋ ಅನುಭವಿಸುವ ದೌರ್ಜನ್ಯದ ವಿರುದ್ಧವಾಗಿ ಮೂಡಿಬರುವ ಅಭಿವ್ಯಕ್ತಿ. ಹೆಣ್ಣು ಸಾಮಾಜಿಕವಾಗಿ ತನ್ನ ಸುತ್ತ ಎದುರಿಸಬೇಕಾದ ಸವಾಲುಗಳು, ಆಕೆಯ ನಿತ್ಯ ಜೀವನ ಶೈಲಿ, ಆಕೆಯ ಸ್ಥಿತಿ-ಗತಿಗಳ ಸ್ಪಂದನೆಯದು. ಒಬ್ಬ ಅನುಭವಿ ಕಲಾವಿದೆಯ ಕಲಾಕೃತಿಗಳಲ್ಲಿ ಸಿಗುವ ವಿಷಯಗಳಿವು.

ಕರ್ನಾಟಕದಲ್ಲಿ ಹುಟ್ಟಿ, ಮುಂಬೈನಲ್ಲಿ ಬೆಳೆದ ಭಾರತದ ಅಂತಾರಾಷ್ಟ್ರೀಯ ಸಮಕಾಲೀನ ಕಲಾವಿದೆ ಶಕುಂತಲಾ ಕುಲಕರ್ಣಿ. ಇವರ ಕಲಾಕೃತಿಗಳ ಕುರಿತಾಗಿ, ವೃತ್ತಿಪರ ಕಲಾವಿದೆಯಾಗಿ ಶಕುಂತಲಾ ಅವರು ಸಾಗಿ ಬಂದಿರುವ 50 ವರ್ಷಗಳ ಅನುಭವ ಕೇವಲ ಹೆಣ್ಣನ್ನಷ್ಟೆ ಅಲ್ಲ, ಪ್ರತಿಯೊಬ್ಬ ಗಂಡಿಗೂ ಸ್ಫೂರ್ತಿಯಾಗುವಂತದ್ದು. ಶಕುಂತಲಾ ಕುಲಕರ್ಣಿ ಅವರ ಇತ್ತೀಚಿನ ಹಾಗೂ ಕಳೆದ ಕೆಲವರ್ಷಗಳಿಂದೀಚೆ ರಚಿಸಿರುವ ಕಲಾಕೃತಿಗಳ ‘QUIETER THAN SILENCE’ ಏಕವ್ಯಕ್ತಿ ಪ್ರದರ್ಶನ ಬೆಂಗಳೂರಿನ ಸುಮುಖ (Gallery Sumukha) ಗ್ಯಾಲರಿಯಲ್ಲಿ ಆಯೋಜನೆಗೊಂಡಿದೆ.

‘Each time a woman stands up for herself, without knowing it possibly, without claiming it, she stands up for all women’

ಅಮೆರಿಕದ ಪ್ರಖ್ಯಾತ ಕವಿ, ಲೇಖಕಿ, ನಾಗರಿಕ ಹಕ್ಕುಗಳ ಕಾರ್ಯಕರ್ತೆ ಮಾಯಾ ಏಂಜೆಲೋ (Maya Angelou)  ಹೇಳುವಂತೆ ಹೆಣ್ಣು ಯಾವತ್ತೂ ತನ್ನ ಪರವಾಗಿಯೇ ನಿಲ್ಲುತ್ತಾಳೆ. ಅರ್ಥಾತ್ ತನಗೋಸ್ಕರ ಧ್ವನಿಯಾಗುತ್ತಾಳೆ. ಈ ಮೂಲಕ ತನಗೆ ಗೊತ್ತಿಲ್ಲದಂತೆ, ಎಲ್ಲಿಯೂ ಹೇಳಿಕೊಳ್ಳದೆ ಎಲ್ಲಾ ಹೆಣ್ಣಿನ ಪರವಾಗಿ ನಿಲ್ಲುತ್ತಾಳೆ. ಏಂಜೆಲೋ ಅವರ ಈ ಮಾತು ಶಕುಂತಲಾ ಕುಲಕರ್ಣಿ ಅವರ ಕಲಾಕೃತಿಗಳಿಗೆ ಬಹಳ ಹೋಲಿಕೆಯಾಗುವಂತಿದೆ. ಅವರೊಳಗಿನ ಮುಗ್ಧತೆ, ತಲ್ಲಣ, ಆಕ್ರೋಶವನ್ನು ಮತ್ತು ಕಳಕಳಿ-ಅನುಕಂಪವನ್ನು ಕಲಾಕೃತಿಗಳಲ್ಲಿ ಕಾಣಬಹುದಾಗಿದೆ.

ವಿಭಿನ್ನ ಏಳು ಸರಣಿ ಕಲಾಕೃತಿಗಳನ್ನು ಏಳು ಕಥೆಗಳ ಮೂಲಕ ಪ್ರಸ್ತುತಪಡಿಸಿರುವ ಶಕುಂತಲಾ ಕುಲಕರ್ಣಿ ಅವರ ಒಂದೊಂದು ಕಲಾಕೃತಿಯೂ ನೋಡುಗನಿಗೆ ಸಣ್ಣದೊಂದು  ಕಥೆಯಾಗಿಯೆ ಕಾಣಿಸುತ್ತವೆ. ಏಳಲ್ಲ, 70 ಕಥೆಗಳನ್ನು ಹೇಳುವ ಶಕ್ತಿ ಅಥವಾ ಭಾವ ಅವರ ರೇಖೆಗಳಲ್ಲಿ ಕಾಣಬಹುದಾಗಿದೆ. ದೇಹದ ವಿಭಿನ್ನ ಭಂಗಿಗಳನ್ನು ತೋರಿಸುವ ಪ್ರಯತ್ನಗಳು ಅವರೊಳಗಿನ ಅನುಭಾವವಾಗಿಯೂ, ಅನುಭೂತಿಯಾಗಿಯೂ ಗ್ರಹಿಸುವಂತೆ ಮಾಡುತ್ತವೆ. ಬಹು ಸಹಜ ಶೈಲಿಯಲ್ಲಿ ಅಭಿವ್ಯಕ್ತಿ ಪಡಿಸಿರುವ ಕಲಾಕೃತಿಗಳನ್ನು ತೋರ್ಪಡಿಸಿರುವ ಕ್ರಮ ಕ್ರಿಯಾಶೀಲವಾಗಿಯೂ, ಅತ್ಯಂತ ಪ್ರಬುದ್ಧವೆನಿಸುತ್ತವೆ. ಗೋಡೆಗಳ ಮೇಲೆ ಇಳಿಬಿಟ್ಟು ತೋರಿಸುವ ಪ್ರಯತ್ನಕ್ಕೆ ಮುಂದಾಗದೆ, ಟೇಬಲ್‌ಗಳ ಮೇಲೆ ಪುಸ್ತಕ ತೆರೆದಿಡುವಂತೆ ಇಟ್ಟು ದೃಷ್ಟಿಕೋನ ಬದಲಾಯಿಸಿದ್ದಾರೆ. ಈ ಮೂಲಕ ನೋಡುಗರ ದೇಹ ಭಾಷೆಯಲ್ಲೂ, ನಡವಳಿಕೆಯಲ್ಲೂ ಹೊಸತು ಹುಡುಕುವ ಪ್ರಯತ್ನ ನಡೆಸಿದ್ದಾರೆ.

Stuck in the shadow, Fallen Warrior, Lullaby, Imbalance ಮತ್ತು Swaha ಶೀರ್ಷಿಕೆಯ ಸರಣಿ ಕಲಾಕೃತಿಗಳು ಹೊರನೋಟಕ್ಕೆ ಸಹಜವೆನಿಸಬಹುದು. ಆದರೆ, ಕಲಾಕೃತಿಗಳನ್ನು ರಚಿಸುವ ವಿಧಾನ ಗಮನ ಸೆಳೆಯುತ್ತವೆ. ಕಲಾಕೃತಿಯೊಳಗಿನ ಗೂಡಾರ್ಥ ನೋಡುಗರನ್ನು ಕ್ಷಣಕಾಲ ಹಿಡಿದು ನಿಲ್ಲಿಸುತ್ತವೆ. Stuck in the shadow ಶೀರ್ಷಿಕೆಯ ಕಲಾಕೃತಿಗಳಲ್ಲಿ ತುಸು ಜಪಾನಿ ಉಡುಪು, ಕೇಶ ಶೃಂಗಾರದ ಪ್ರಭಾವವಿದೆ. ಬಹುತೇಕ ಕಲಾಕೃತಿಗಳಲ್ಲಿ ಅವರ ಈ ಹಿಂದಿನ ಕಲಾಕೃತಿಗಳಲ್ಲಿನ ಬೆತ್ತದ (cane) ರಕ್ಷಾ ಕವಚಗಳ ಆಕೃತಿಗಳನ್ನು ಉದ್ದೇಶ ಪೂರ್ವಕವಾಗಿ ಬಳಸಿಕೊಂಡಿದ್ದಾರೆ. ಈ ಮೂಲಕ ತಾವು ಹೇಳಬೇಕಾದ ಸಂದೇಶವನ್ನು ನೋಡುಗರಿಗೆ ತಲುಪಿಸುವ ಪ್ರಯತ್ನ ನಡೆಸಿದ್ದಾರೆ. ಹ್ಯಾಂಡ್‌ಮೇಡ್ ಕಾಗದದ ಮೈವಳಿಕೆಯನ್ನು ಚಾರ್ಕೋಲ್ ಮಾಧ್ಯಮಕ್ಕೆ ಸೂಕ್ತವಾಗಿಸಿ ರಚಿಸಿರುವುದು ಗಮನಾರ್ಹ. 50 ವರ್ಷಗಳ ವೃತ್ತಿಪರ ಪಯಣದಲ್ಲಿ ವಿಶ್ವದ ಅನೇಕ ಅಂತಾರಾಷ್ಟ್ರೀಯ ಕಲಾಪ್ರದರ್ಶನಗಳಲ್ಲಿ ತಮ್ಮ ಚಿತ್ರ ಮತ್ತು ಶಿಲ್ಪ ಕಲಾಕೃತಿಗಳನ್ನು ಪ್ರದರ್ಶಿಸಿರುವ ಶಕುಂತಲಾ ಅವರ ಈ ಸರಣಿ ಕಲಾಕೃತಿಗಳಲ್ಲಿಯೂ ರಂಗಭೂಮಿಯ ಪ್ರಭಾವ ಇರುವುದನ್ನು ಕಾಣಬಹುದು.

ವಿಶ್ವದ ಪ್ರತಿಷ್ಠಿತ ಕಲಾಪ್ರದರ್ಶನಗಳಲ್ಲಿ ಶಕುಂತಲಾ ಕುಲಕರ್ಣಿ ಅವರ ಕಲಾಕೃತಿಗಳು ಪ್ರದರ್ಶಿಸಲ್ಪಟ್ಟಿವೆ. ಅವರ ಅತ್ಯಂತ ಪ್ರಿಯ ಮಾಧ್ಯಮ ಬೆತ್ತದಿಂದ ರಚಿಸಲ್ಪಟ್ಟ ರಕ್ಷಾ ಕವಚಗಳಿಗೆ ಹೋಲುವ, ಅಸ್ತಿಪಂಜರದಂತೆ ಕಾಣುವ ಶಿಲ್ಪ ಕಲಾಕೃತಿಗಳು ಶಕುಂತಲಾ ಕುಲಕರ್ಣಿ ಅವರನ್ನು ಬಲು ಎತ್ತರಕ್ಕೆ ಬೆಳೆಸಿವೆ. ಈ ಸರಣಿಯ ಕಲಾಕೃತಿಗಳು ಸಾಕಷ್ಟು ಕುತೂಹಲದಿಂದ ಕೂಡಿವೆ. ಸದ್ಯ ಬೆಂಗಳೂರಿನಲ್ಲಿ ನಡೆಯುತ್ತಿರುವ ಪ್ರದರ್ಶನದಲ್ಲಿ ರೇಖಾ ಚಿತ್ರಗಳನ್ನು ಮಾತ್ರ ಪ್ರದರ್ಶಿಸಲಾಗಿದೆ. ಮುಂಬಬೈನ ಕೆಮೋಲ್ಡ್ ಗ್ಯಾಲರಿಯಲ್ಲಿ ಪ್ರದರ್ಶಿಸಲ್ಪಟ್ಟ ಕಲಾಕೃತಿಗಳನ್ನು ಅವರ ಸಹಯೋಗದೊಂದಿಗೆ ಸುಮುಖ ಗ್ಯಾಲರಿಯಲ್ಲಿ ಪ್ರದರ್ಶಿಸಿದ್ದು, ಕರ್ನಾಟಕದ ಕಲಾವಿದರಿಗೆ ವೀಕ್ಷಣೆಗೆ ಸಿಕ್ಕಂತಾಗಿದೆ.

ನವೆಂಬರ್ 23ರಂದು ಕಲಾಪ್ರದರ್ಶನ ಸಂಪನ್ನಗೊಳ್ಳಲಿದೆ.

ಕಲಾಕೃತಿಗಳೇ ಮಾತಾಡುತ್ತವೆ:

ಶಕುಂತಲಾ ಕುಲಕರ್ಣಿ ಅಭಿಮತ

ಬೆಂಗಳೂರಿನ ಗ್ಯಾಲರಿ ಸುಮುಖ ಮತ್ತು ಮುಂಬೈನ ಕೆಮೋಲ್ಡ್ (Chemould Gallery) ಸಹಯೋಗದಲ್ಲಿ ಶಕುಂತಲಾ ಕುಲಕರ್ಣಿ ಅವರ QUIETER THAN SILENCE ಕಲಾಪ್ರದರ್ಶನ ಆಯೋಜನೆಯಾಗಿದೆ. ಬಹಳ ವರ್ಷಗಳ ಬಳಿಕ ಶಕುಂತಲಾ ಅವರು ಕನ್ನಡಿಗರಿಗೆ ತಮ್ಮ ಕಲಾಕೃತಿಗಳನ್ನು ಪ್ರದರ್ಶಿಸುತ್ತಿದ್ದಾರೆ. ಈ ಸಂದರ್ಭದಲ್ಲಿ ಶಕುಂತಲಾ ಅವರನ್ನು ‘ವಿಕ್ರಮ’ ಮಾತನಾಡಿಸಿತು. ಮಾತುಕತೆಯ ಸಾರಾಂಶ ಇಲ್ಲಿದೆ.

• ಪ್ರದರ್ಶಿತ ಕಲಾಕೃತಿಗಳ ಬಗ್ಗೆ ವಿವರಣೆ ನೀಡಬಹುದಾ?

ಖಂಡಿತವಾಗಿ, ಈ ಬಗ್ಗೆ ನಾನು ವಿವರಿಸುವುದಕ್ಕಿಂತಲೂ ಇಲ್ಲಿರುವ ಕಲಾಕೃತಿಗಳೆ ಮಾತನಾಡುತ್ತವೆ. ಆದರೂ ಪ್ರಯತ್ನ ಮಾಡುತ್ತೇನೆ. ಇಲ್ಲಿ ಪ್ರದರ್ಶಿಸಲ್ಪಟ್ಟ ಕಲಾಕೃತಿಗಳಲ್ಲಿ ಹೆಚ್ಚಿನವು ಕೊವಿಡ್ ಮತ್ತು ಆ ನಂತರದ ದಿನಗಳಲ್ಲಿ ರಚಿಸಿರುವಂತವು. 2019ರಿಂದ 2020ರ ಅವಧಿಯಲ್ಲಿ ದೇಹದ ರಕ್ಷಣೆಗಾಗಿ ನಡೆಸಿರುವ ಪ್ರಯತ್ನಗಳು ನನ್ನ ಮೇಲೆ ಸಾಕಷ್ಟು ಪ್ರಭಾವ ಬೀರಿದವು. ಸ್ವತಃ ನಾನೂ ಯೋಗ ಮಾಡುವುದರಿಂದ ದೇಹದ ರಕ್ಷಣೆ ಕಾರಣಕ್ಕಾಗಿ ನಡೆಸಿರುವ ಹಾಗೂ ಆ ಸಂದರ್ಭದಲ್ಲಿನ ಕೆಲವೊಂದು ಘಟನೆಗಳ ಪ್ರಭಾವ ಇಲ್ಲಿರುವ ರೇಖಾಚಿತ್ರಗಳ ಸೃಷ್ಟಿಗೆ ಕಾರಣವಾದವು. ನನ್ನ ಈ ಹಿಂದಿನ ಸರಣಿ ಕಲಾಕೃತಿಗಳು ಮತ್ತು ಬೆತ್ತದಿಂದ ರಚಿಸಲ್ಪಟ್ಟ ಶಿಲ್ಪ ಕಲಾಕೃತಿಗಳಲ್ಲಿನ ಶೈಲಿಯೂ ಈ ಕಲಾಕೃತಿಗಳಲ್ಲಿ ನೋಡಬಹುದು. ಮ್ಯೂಸಿಯಂ ಅಕ್ರಿಲಿಕ್ ಶೀಟ್‌ಗಳನ್ನು ಮತ್ತು ಗ್ಲಾಸ್‌ಮಾರ್ಕ್ ಪೆನ್ಸಿಲ್‌ಗಳನ್ನು ಈ ರೇಖಾಚಿತ್ರಗಳ ರಚನೆಗೆ ಬಳಸಿಕೊಂಡಿದ್ದೇನೆ. ಬಹಳ ಸರಳವೆನಿಸುವ ರೀತಿಯಲ್ಲೆ ಇವುಗಳನ್ನು ರಚಿಸಿದ್ದೇನೆ. ಆರಂಭದಲ್ಲೆ ಈ ಕಲಾಕೃತಿಗಳು ಅತ್ಯಂತ ಖುಷಿಕೊಟ್ಟವು. ಬಳಿಕ ಅದನ್ನೇ ಮುಂದುವರಿಸಿದೆ. ಅವುಗಳಲ್ಲಿ ಆಯ್ದ ಕಲಾಕೃತಿಗಳನ್ನು ಇಲ್ಲಿ ಪ್ರದರ್ಶಿಸಿದ್ದೇನೆ. ಹೆಣ್ಣು ದೈಹಿಕವಾಗಿ ಎದುರಿಸುವ ಸವಾಲುಗಳು ನನ್ನ ಮೇಲೆ ಪರಿಣಾಮಕಾರಿಯಾಗಿ ಪ್ರಭಾವ ಬೀರುತ್ತವೆ. ಸಹಜವಾಗಿ ಅವು ನನ್ನ ಕಲಾಕೃತಿಗಳ ರಚನೆಗೆ ವಸ್ತು ವಿಷಯವಾಗುತ್ತವೆ. ಇದಕ್ಕೆ ಸಂಬಂಧಿಸಿದ  ಕಲಾಕೃತಿಗಳು ಇಲ್ಲಿವೆ.

• ‘ಸ್ವಾಹ’! ಯಾಕೆ ಈ ಶೀರ್ಷಿಕೆ?

ನೋಡಿ ಈ ಸರಣಿ ಕಲಾಕೃತಿಗಳಲ್ಲಿಯೂ ಹೆಣ್ಣು ಪ್ರಧಾನವಾಗಿದ್ದಾರೆ. ಅವರು ತಮ್ಮ ಮೇಲಿನ ಭಾರಗಳಿಂದ ಮುಕ್ತಿ ಪಡೆದಾಗ ಮಾತ್ರ ಸ್ವತಂತ್ರಳಾಗುತ್ತಾಳೆ. ಈ ಸರಣಿ ಕಲಾಕೃತಿಯಲ್ಲಿ ಭಾರ ಕಡಿಮೆ ಮಾಡಿಕೊಳ್ಳುವ ಅಥವಾ ಸ್ವಾತಂತ್ರ್ಯ ಬಯಸಿ ನಿಂತಿರುವ, ಕೈಯಲ್ಲಿ ತಮ್ಮ ಶಿರತ್ರಾಣವನ್ನು ಕಳಚಿ ಹಿಡಿದು ಆಹುತಿಯಾಗಿಸುವ ಅಂದರೆ ಸಮರ್ಪಿಸಿ ಸ್ವತಂತ್ರವಾಗಬೇಕೆಂದು ಮೆರವಣಿಗೆಯಲ್ಲಿ ನಿಂತಿರುವಂತೆ ಚಿತ್ರಿಸಿದ್ದೇನೆ. ಇದು ಈ ಕಾಲಘಟ್ಟದ ಹೆಣ್ಣಿನ ಸ್ಥಿತಿಯೂ ಹೌದು. ಈ ಕಲಾಕೃತಿಗಳಲ್ಲಿಯೂ ರಕ್ಷಾಕವಚದ ಅಂಶಗಳನ್ನೆ ಬಳಸಿಕೊಂಡಿದ್ದೇನೆ. ಈ ಕಾರಣಕ್ಕಾಗಿಯೆ ಸ್ವಾಹ ಶೀರ್ಷಿಕೆ!

• ರಂಗಭೂಮಿಯ ಕಡೆ ಆಸಕ್ತಿ ಹೇಗೆ? ನಿಮ್ಮ ದೃಶ್ಯ ಕಲಾಕೃತಿಗಳ ಮೇಲೆ ಇದರ ಪ್ರಭಾವ ಇದೆಯಾ?

ನನ್ನ ಮನೆಯ ವಾತಾವರಣ ಇದಕ್ಕೆಲ್ಲ ಪೂರಕವಾಗಿದೆ. ನಾನು ಬೆಳೆದು ಬಂದಿರುವುದು ಈ ವಾತಾವರಣದಲ್ಲಿ. ತಾಯಿ ಮತ್ತು ಇಬ್ಬರು ಸೋದರಿಯರು ರಂಗಭೂಮಿ ಹಿನ್ನೆಲೆಯವರು.  ನಾನೂ ಕೂಡ ಅನಿಕೇತ್ ಹೆಸರಿನ ರಂಗಭೂಮಿ ಗುಂಪಿನ ಭಾಗವಾಗಿದ್ದೆ. ಅನೇಕ ಶಿಬಿರ, ತಾಲೀಮುಗಳಲ್ಲಿ ಪಾಲ್ಗೊಂಡಿದ್ದೇನೆ. ಕೆಲ ಸಂದರ್ಭಗಳಲ್ಲಿ ಅಭಿನಯಿಸಿದ್ದೇನೆ. 70ರ ದಶಕದಲ್ಲಿ ನಟನೆ, ಸಂಭಾಷಣೆ, ನಿರ್ದೇಶನ, ಧ್ವನಿ-ಬೆಳಕು ಮತ್ತು ರಂಗ ಸಿದ್ಧತೆಗಳಲ್ಲಿ ತೊಡಗಿಕೊಂಡಿದ್ದ ಮರೆಯಲಾರದ ದಿನಗಳವು. ಹೀಗಾಗಿ ರಂಗಭೂಮಿಯ ಬಗ್ಗೆ ತಕ್ಕಮಟ್ಟಿಗಿನ ಅನುಭವವಿದೆ. ಪ್ರಯೋಗಗಳನ್ನು ಮಾಡಿದ್ದೇನೆ. ನನ್ನ ಪರ್ಫಾಮೆನ್ಸ್ ಪ್ರಯತ್ನಗಳ ಮೇಲೆ ಇದರ ಪರಿಣಾಮ ಇರಬಹುದು. ಆದರೆ, ನನ್ನ ದೃಶ್ಯ ಕಲೆಗಳ ಮೇಲಿನ ಯಾವುದೆ ಆಲೋಚನೆಗಳು ಇದರಿಂದ ಪ್ರಭಾವ ಹೊಂದಿಲ್ಲ.

• ದೃಶ್ಯ ಕಲೆಯ ಅನೇಕ ಪ್ರಕಾರಗಳಲ್ಲಿ ಅಚ್ಚರಿಯ ಪ್ರಯತ್ನ ನಡೆದಿದೆ…

ಹೌದು, ಇದು ನನಗೆ ಖುಷಿ ಕೊಡುವಂತವು. ನಮಗೆ ಖುಷಿ ಕೊಡುವುದು ನಮ್ಮ ಆಸಕ್ತಿಯಾಗಬೇಕು. ಆಸಕ್ತಿ ಇದ್ದಾಗ ಅಲ್ಲಿ ಯಶಸ್ಸು ಕಂಡುಕೊಳ್ಳಲು ಸಾಧ್ಯವಾಗುತ್ತದೆ. ನಾನು ನಡೆಸಿರುವ ಪ್ರಯತ್ನಗಳಲ್ಲಿ ನನಗೆ ಸಂತೋಷ ಸಿಕ್ಕಿದೆ. ಇಂತಹ ಪ್ರಯೋಗಾತ್ಮಕ ಕಾರ್ಯಗಳನ್ನು ಮಾಡುತ್ತಿರುತ್ತೇನೆ. ಇದೆಲ್ಲದರ ಪರಿಣಾಮ ಇಲ್ಲಿಯತನಕ ಬಂದಿದ್ದೇನೆ.